أزمة ضمير...بقلم الشاعر ياسر شرف

قصيدة ازمة ضمير
===========
يطير بسرعة مع العصافير وانده وأقول له فينك ياضمير
وابعت واخاطبه فى كل مكان تركت ليه مخلوق انسان
صنايعى يجى فى شغلانة وبيقاولنى على الحالة
فلوس وصنعة ويا ميعاد يقبض ويهرب ويا سعاد
ولو اشتغل بيغش زبون ويسوق ويهرى فى القولون
وانده وأقول فينك يا ضمير تعبت قلبى كتير وكتير
ونفس الحكاية ويا طبيب يسيب ويهمل وبرضه يغيب
ويجرى بسرعة على عيادته وتزيد فيزيته ووجاهته
حتى المقاول يبنى اساس ويغش فى المونة للناس
ويتهد مبنى وعمارة وضميره يركب طيارة
او حتى يرصف يعنى طريق يهبط بسرعة وخلقه يضيق
ولو مدرس همه دروس تعليم يشوه وبسببه يبوظ
فى المدرسة مقاول تلاميذ يلم غلة وحاله يغيظ
وهدفه فى دروس خصوصية والناس بتدفع له ماهية
واعلامى برضه عنده ضمير وزميله منه يعنى يغير
ينشر فى أوهام مع أكاذيب وكأنه تعلب وقط وديب
ويضلل الناس كده بجنون لهدف وغاية فى المضمون
وسياسى ماكر والعوبان ضميره ميت ودفنه كمان
ويقول طبيعة سياسية وهى كارثة وقومية
دول كبيرة او أشخاص ضميرها مدفون وباخلاص
إيمان وصدق ويا أمانة دى مكوناته يارجالة
طب ليه نسيبه ده العقل احتار وياريت نلاقيله قطع غيار
وتاجر يبيع كله بميزان ويغش فى الوزن بأحكام
وبضاعة منتهية صلاحية يبيعها برضه بحرفية
حتى الموظف فى حكومة ياخد فى رشوة برعونة
ويسميها حسنة وملاغية او اصطباحة واكرامية
ايه اللى ناقص يااخوانا دى الأزمة دى وقفت حالنا
وسببها نقص من الإيمان مع ضعف نفس ومكر شيطان
ويبقى لابد من التغيير دى المشكلة أزمة ضمير
ياسر شرف- كبير محررين مترجمين
بقطاع الاخبار- الاذاعة والتلفزيون