............****** انا وصديقى الفيس ( 2)..******...........
-------------------------------------------------------------
الفيس دا زى جنينه ... موجوده جنب البحر
فيها ورود طيّبه .. واشجار ونخل وزهر
تشم فيها العبير .. وتحكى للأمواج
عاللى ما تقدر تقوله.. فى العلن والسر
أصحاب وصاحبات وإخوه والعدد ألوفات
أشكال وألوان.. صحاب .. من كل قطر وهات
تأنس إليهم وهما برضه نفس الشىء
الحب جمع القلوب... على جهاز و صديق
تضغط تشوف العجب... دنيا وفضاء واسع
مالوش نهايه محيط... فيه كل شىء نافع
عاوز علوم وثقافه .. موجود على الصفحات
عاوز صور أو مناظر.. تؤمر تيجى الساحرات
والميزه إن الجنينه ... موجوده جنب البحر
اللى ما يعجبش فيها ... يترمى فى البحر
لأن فيه فى الجنينه... شجر وله أشواك
ملهش لازمه ف حياتك .. أولى بيه البحر
وفيه قصص وعبر .. وفيه كمان محاذير
وفيه طيور طيبه .. وفيه كمان صراصير
وانت وذوقك بقى... بتحب مين فيهم ؟
تعشق جمال العيون ... وللا كبير المناخير؟!
جنينه سندسها أخضر .. ترتاح لها نفسك
نعمه عظيمه يا فيس.. شغلتنا بحسنك .
....................................