الاهة اجمل مركبة للشاعر علاء الدين على مجلة نجوم الادب والشعر

الآهة أجمل مركبة
********
همسة عنيها بالهوى
شرخت جدار الصمت
ف القلب الوحيد
واتفجرت أحساسيسي آه
من همسها
الآهة أجمل مركبة
ماشية ف بحر الدم تنقل نبضتي
بشراع حزين
والنبضة ليها ميت لسان
يسألها ليه؟
كل نبضة حب عند الناس فرح
وإنتي عاشقة للأنين
مع إن إحساسك جميل
لو ينطلق شعر وغنا
كان الورق أكيد نطق
ل ودان قلوب العاشقين
قوموا إعلنوا عن عشقكم
ما تكسبي فيهم ثواب
ومتبعديش
إتحرري من ضعف صابك ناحيتي
وانا هاكتفي
أسمع عنيكي بتعترف
أهو ضي جايني م القمر
بيخلي عتمة ليل نهار
وان يوم نطقتي بالهوى
مارد الوحدة العفي
أقدر عليه
مانتي الونس
حتى رماد الذكرى أقتل وحدته
يا نهار جميل من غير غروب
سايباني عايزة تهربي!
ليه الهروب ؟
عنواني عين
نطقت بهمسة للهوى
أما إنتي عنوانك كيان
وعشان يعيش
همسك دوا ف متبعديش
*********
كلماتي / علاء الدين علي