نفسي أكتب لك بحبك...بقلم الشاعر رضا ابو الغيط

نفسى أكتب لك بحبك
بس منعانى الخناجر
خُفت أقولك إنى إبنك
أصل سيفهم ف الحناجر
بس لازم تفهميها
من عيونى واللى فيها
كُنت عايش جنب منك
وللا منك..عمرى هاجر
إقرى بًعدى كُراساتى
والدموع اللى ف سُكاتى
هاتى ودنك جنب قلبى
إسمعى صرخة أهاتى
كل حاجه... فيا قالت
إنى إبنك .وإنتى أمى
إلا صوتى اللى تملى
فوق رقبته نصل غادر
نفسي اكتب ع الحيطان
اني عاشق من زمان
نفسي اصرخ لك بصوتي
بس فين هو الأمان
نفسي افرد لك ضفايرك
فوق كتافي وأبقي شايلك
بس خايف م العناكب
واللي راكب ع المنابر
نفسي أكتب لك بحبك
بس منعاني الخناجر
خفت أقولك اني ابنك
أصل سيفهم نصله شاطر
بس لازم تسمعيها وتلاقيها
فوق ترابك تحت بابك
اصل لازم يا امه أقولها
حتي لو قطعوا الحناجر
رضا أبو الغيط