خلص الكلام
والكل نام ع المصطبه
الا القمر واقف حرس
يحرس قلوبنا الطيبه
لمحت عيوني ع الشجر
عصفور حزين قلبه انكسر
من يتم صابه ف الصبا
حس ان ضاع منه الشراع
وف بحر مليان بالدموع
تاهت قلوع المركبه
بكت العيون من حزنها
علي طير وطالب ودها
حلمه ف حياته يتنصف
وينام له ليله ف حضنها
مديت ايديا للفروع
ومسحت له كل الدموع
وعملت كفي مخدته
وايديا عاشقه الطبطبه
شوفت ابتسامه بتترسم
من فرحته جوه العينين
كات تايه منه ف دمعته
كات غايبه عنه من سنين
لما الحنين ..داوي الأنين
وعادت له .... أيام الصبا
فرد الجناح وسط البراح
وطار .....يدور ع الصباح
وقلوب حبايبه.....الطيبه
*********************