القلب آيل للسقوط
والعمر راح ويا السكوت
وقلوبنا مش عايزة الحياة
تبعتنا للقبر ف تابوت
الحظ مش مخلوق كيان
ولا كان ف يوم قافل بيبان
ولا ييجي مرة يدق لك
ويروح يعيد نفس البيان
اللي انت فاكره قريب قوي
يطلع شايل لك ألف سيف
واللي انت حابه كتير قوي
عمره ما هيكون لك أليف
الحب كله كلام جميل
لو انت حاسه شعور نبيل
بس القلوب متعودة
على حب من عابر سبيل
ياللي حصادك كان آلام
وضحكتك مالية الفضا
حسيت ف مرة انك ملام
أو نبض قلبك له صدى
انا جيت أعيش مرة
ف خيال
لأني مش لاقى الأمل
بس الحقيقة الحظ مال
والجرح مبقاش محتمل
فكرت يوم ابعد بعيد
يمكن ألقي هناك أمان
ملقتش مرة ف سكتي
غير نسخة من نفس الغيلان
وهربت من حظي المرير
وعملت أخرس أو ضرير
ووصلت في قلب النهار
كان عندي لسه كتير آمال
وفرحة نفسي ف يوم تبان
مش صدفة اني لقيت آلام
وبيبان كتير متقفلة
وناس تتاجر بالكلام
والحب أصبح مشكلة
والفوضي كات مالية المكان
والعدل بره المعضلة