طمنّها "
فَـــ ... طمّنهـــــا ...
وما تسيبهاش لأوجاعها .. وأمّنهـــــــــــــــــا ...
وما تخيّبش تخمينهـــــا ..
وطمّعها .... وسمّعهــــا
كلام كل اللي حبينهـــا ..
..
وكُون بيتهـــا .. وفرحتها
وكُون بيها ... وكُون منها
وما تخبّيش مشاعرك فيك
وخبّي فيك ..مشاعرهـــا
..
وشكّل قلبها بايديــــــــــك
وسيب قلبك يشكّلهــــــا
ولوّن كل أشواقــــــــــــك
بلون عينهــــــــــــا ..
و ما تسيبهاش لأوجاعهــا وطمّنهــــــــــا ...
.....
وكون دايما أمان ليها
وحلي الدنيا فــ عينيها
وما تضيَّعش ولا ثانية
بعيد عن أي شيء فيها
..
وعيش ليها ... وعيش بيها
وعيش فيها
كأنك حاجه مخلوقة
عشان تبقى حاجات ليها
..
وحس بكل حكاويها
وغني كل أغانيها
ولون كل تفاصيلك
بلون الفرحة فــ عنيها
..
وخد أحلامها فــ منامها
وهاتهالها ..
وخد أحزانها من بالها
وشيلهالها ..
وهات قلبك كمان نصين
وسيب نُصُّه يدقّلها ..
ونُصُّه التاني ..
سيبهولها ..
و ما تسيبهاش لأوجاعهــا وطمّنهــــــــــا
موضوع: المركز الثاني بشعر العامية قصيدة طمنّها 38.5 درجة للشاعرأحمد أبوزيد مرسي/ مصر 
الأحد أغسطس 28, 2016 5:12 am
