عاوز أسألك ... بقلم الشاعر المصري ــــ تامر النقيب ـ مجلة نجوم الأدب والشعر

القلوب الطيبه
اللي بتحب وتوفي
بتبقي مظلومه الزمان ده
نفسي أسأل ؟
يمكن أهدى
عاوز أفهم حاجه واحدة؟
هو أيه معنى الموده والمحبه؟
هو ليه ببقى معاكِ ؟
ببقى عايش ليه بغربه؟
ببقى حاسس ليه بعله
أصل حبك مش مذله
ده أنتِ علمتيني أحب
حبك إنتِ شال ما خَلا
بس ليه وبدون سبب ؟
قلبى من بُعدك بيشرب م العذاب
عودتى قلبى كل ليله ع الغياب
بعد حُب كبير مابينا
كل شئ أصبح سراب
فجأه غيرتى مشاعرك
ودفنتى قلبى ف التراب
وتقوليلى غصب عني
وغصب عني
نفسي بس أسألك
علي حاجه واحده
هو إيه معني الموده والمحبه ؟
عاوز أقولك كلمتين
وأحكي ليكِ إزاي أنا
ف حبك سجين
واللى شيلته يوم عشانك
من حنـــين
صدقينى كان يكفيكــِ ياعمرى
كل أيام السنين
أنا لسه نفسي أفرحك
ولا يوم يبات قلبك حزين
مقدرش أسيبك
جوه ليل الموجوعين
مقدرش أشوفك عايشه
ضمن المحرومين
ده أنا بعت كل الكون عشانك
وعمرى كله منى عدى
بس نفسى أسألك
على حاجه واحدة
هو أيه معنى المودة والمحبه؟
عاوز أسألك
هو أنا فعلا حبيبك ولا عادى؟
لما أغيب عنك وأبعد
وأما أقول مشتاق لحضنك
وأما أحس دنيتى تسود بَعدك
بتبقى جد حاسه بيا وبسهادى
ولا برضو بيبقى عادى؟
عاوز أقولك
تاني برضو كلمتين
أصلي لسه عليكِ باقي
لسه واهبلك حنينى وأشتياقى
ده أنت من دائي ودوائي
لسه أقرب ليا مني
رغم بعدك
رغم هجرك كل ليله
لسه كلي برضو عاشقك
ببقى مستنى تجينى
وأستنى أشوف ضحكه شفايفك
رغم كل القسوه منك
لسه والله بحبك
عارفه ليه ؟
الحب يبقى عطاء
تفاهم وأشتياق
وأنى أشيل الهم عنك
أبقى ليكي أخ . صديق . حبيب
وقلب مايعرف فراق
وأبقى شايفك
لوبعيده عن عيونى
وأبقى سندك
وأبقي أنا منك وكلك
هو دة حبى انا
وبأختصار فى كلمه واحده
وهو دة اللي فهمته
طول حياتى
وهو دة معني الموده والمحبه