نقوش على جبين البحر... بقلم الشاعر المصري احمد عثمان - مجلة نجوم الأدب والشعر

نقوش على جبين البحر
***
" ادعيلى يامه المركب تعُود
دى الرحلة صعبه .. حدود وراها حدود
والبحر يامه مالوش أمان
هىَّ طلعه ..
لو رجِعت .. هارمى في حجرك ماجمعت
تسدي دينك، والرهان ..
واختى تبات في بيت عدَلْها
آه لو ربِك يامه عدَلْها ..
لفرَّق في البلد شرْبات .."
......
لسه الكلام في ودن أمك ..
طازه وبيرنّ
سنين بتدعيلك تعُود ..
والقلب نَوَّاح بيئن
لسه الأمل جُوَا القلب متْرَبَّع
ــ راح يرجع .. راح يرجع ..
هوه سواد الليل ونوره يطلع..
والضحكه تفرَّع، وتتمطع
.. بس ليلك ياجدع طوِّل ..
وضلامه غطَّس
عوضِك على الله ياام الجدع..
دا البحر جاحد ..
لما بياخد؛ مابيرجَّع