حبيبى شيف
=======
حبيبى خفة ودمه خفيف وشغلته بالعربى ده شيف
شبك ده قلبى فى الحلة وقلبه بمعلقة واتسلى
وحبه معصور ومسبك وفى روحى مشوى ومتشبك
ويطلع ساعات فى الفضائيات ويطبخ ويشرح فى الوصفات
وطرطوره ابيض كده وجميل بالمريلة وسمار النيل
مشوى ومقلى وبرضه سوتيه مطبوخ مسبك يا ابن الآيه
وكأنه مولود فى المطبخ خبير ادارجى ويصبح
ويسالوه فى التليفونات عن كل أكلة بالوصفات
ويغرف لى محشى كده بلية مليان بحب وحنية
كندوز وضانى وبتلو ريش ضلوعى تدق له
والرز بالكارى مشطشط يدخل فى روحى ويتنطط
وملوخية بالطشة هنية تزيد لهيب الملاغية
وبورى مشوى وسنجارى يهز عقلى وكيانى
وقلت إمتى هواك يا جميل يجمعنا كده على شط النيل
وكان باب السما مفتوح وطلبنى قلت ياروح الروح
وبسرعة تمم الانجاز وبطبخة واحدة صار فى جواز
لكن المشاكل والتكييف حصلت لأنه يعنى الشيف
اعمل له كوسة بالصلصة ينقد فى وصلة متصلة
وبطة ويا ملوخية يقول لى ناقصة تقلية
وفراخ برز وشعرية يقول هرستى الشعرية
وفاصوليا خضرا بلون الزرع يقول دى ناقصة حبة ملح
ومحشى كرنب مع بتنجان يقول دى خلطة اى كلام
يعنى عشان ماهو يعنى الشيف ينقد فى اكلى بشكل سخيف
غلبت دايما كده وياه والأكل صار مشكلة ده معاه
واقول له اطبخ حتى الفول يرد عل طول مش مسئول
لكنه يوصف كده وصفات وينتقد كل الاكلات
بالراحة وشوية عليا ده الطبخ عايز ملاغية
بكره انافسه طبيخ ورغيف ويقولوا فاقت جوزها الشيف.
مع تحيات الفقير الى الله
ياسر شرف- كبير محررين مترجمين
بقطاع الاخبار- الاذاعة والتلفزيون