المركز السابع مجال شعر العامية بمسابقة مجلة نجوم الأدب والشعر دورة مارس 2016 قصيدة باقي زمن حبك 54 درجة للشاعر أيمن بلال / مصر

باقي زمن حبك........
من شق نور الفجر بأنده علي فجرك
وف عز الصمت بينطق قلبي باسمك
مش حب ولا غرام ولا خيال وأحلام
دي حكاية عمر اتربي علي عشقك
.........
وتندهلي دروبك أنفض تراب توبك
وأعطر بيه يومي م الفجر لغروبك
وحبة نسيم من عصرك لمحبوبك
ينده ضحكاية تنسيني هموم حبك
.......
وف عز سواد ليلك نورك بيلقاني
ينسيني قسوة حكم وداني لسجاني
ورغم خوف الوحدة القاكي ندهاني
ويطل نور صوتك يطرح أمل عشقك
........
ياضحكاية رغم الألم ف لمة صحاب
ياحب رغم اليأس عن قلبي ما غاب
ياحكاية رغم الزمن ما عرفت عتاب
ومهما أغيب عنك يفضل عمري منك
........
تعباني وف عز التعب أنا بأعشقك
لو يوم غاب صوتي بقلبي بأندهك
حتي لو خدوا نور عيني هأعرفك
ياعشق صعب ياخده حد تاني منك
.......
وتفضلي رغم اني فيكي وحشاني
وتفضلي أمل ينده بكره ويترجاني
وتفضلي غنوة بقمر ليلها وخداني
وتفضل أحلامي ورا قضبان سجنك
:::::::::::::::::::::::::::::::::::::