النهار له عيون...بقلم الشاعر مدحت عطية.

النهار له عيون
للشاعر مدحت عطية
كل ما النور
يتسحب يروح
فى حته
تضلم
كل ما الشمس
تمشى فوق مكان
يغيم
حتى الديك
صوته .. بينيم
بعد ما كنا
ننام
ندخل فى أمانها
زرعوا التوهه
وشالو الطيبة
من إنسانها
أشرار العالم
على ببانها
رسموا الخطوة
قبل مكانها
كان غطا
واحد بيغطينا
دلوقتى بحس
إن الغطا
معرينا
كنا نخاف
نتلم
نخش فى بعضينا
دلوقتى
الخوف
من بعضينا
الدنيا ضلمه
مُش باين
مين كان
معاكِ
ومين . . هيكون
حيرة
مش . . عارف
مين فينا
الصادق
ومين فينا
الدون
إحنا فى ليل
والليل . . أعمى
بس النهار له
عيون
لازم الصبح
يطلع
ويستخبى الليل
فى الهيش
والنور لازم يعدى
من الأزاز
والشيش
حب الوطن
بيدى . . حياة
وإلـ مستنى نهارك
يا بلادى ما بينتهيش
وهيعيش
والحسرة وافقة مستنية
الـ نفسه نهارك
ما يجيش
مش دى يا بلادى
ملامحك
متاخده منينا
ومن نفسك
مش ده ليلك
مش ده فجرك
وحشانى يا بلادى
وأنا فى حجرك
وحشنى صوت
الحياة فى صدرك
النهار هيطلع
وهيبان
مين إلـ صان
ومين إلـ خان
مين إلـ أكل
من جوعك
ومين إلـ عشانك
بات جعان
هيبان إلـ خاف
وإلـ كان
جبان
مين إلـ غاب
ومين الـ بان
مين إلـ قام
وقت . . الأدان
مدحت عطية