ولسه بحلم
**********
ولسه بحلم
والحلم يراودني
اشوفك يا غالية
بتوبك الأبيض
صبية متعافية
والواد الحليوه حبيبك
لابس ابيض في ابيض
فوق حصانه الابيض
يخدك علي حصانه
يخدك في احضانه
ويطير بيك كما الرهوان
وحبايبك حواليك يزفوك
يهنوك , يباركوك
في يوم فرحك
في يوم عيدك
وانا واقف أغنيك
قصائد حب ما اوفيك
واقطف كام ورده متعافية
اقدمهم لك بأيدي
وبوس على راسك
وبوس علي ايدك
وابوس علي جبينك
وفي عنيك الحلوة انا اتغزل
ولا حد يقدر يوقفني ويرذل
وأحس اني حر
وأعيش من غير مر
من غير قيود تكبلني
وطير في السماء يمر
من غير ما يخاف قناصة
ولا قفص قضبانه زل
العتمة فيه فدادين
واه علي الحلم
لما تكوني انت فيه
يا حببتي محبوسه
جوى زنازين
وانت السجن والسجان
وانت برضك المساجين
**********
ولسه بحلم
وفارد جناحي في الفضاء
طير طال بيه السفر
عاشق نجوم الليل
والقمر على النيل
ماشي يقول مواويل
ويعاكس البنات الصبيانيين
وانا قاعد ساعة صفا
وقت الاصيل
بغزل ضفائر حبيبتي
وأغازل وجهها الاسمر
واجدل لها العقد صفين
واحد فل والتاني ياسمين
واجدل في عيونها غنوتين حلوين
واغني لها يا ليل يا عين
يا عين يا ليل يا عين
يا حببتي كل شيء فيك جميل
يا حببتي ان ملتي كده الدنيا تميل
يا حببتي كل شيء فيك ماله مثيل
وارسم علي القلب وجهك الأسمر
نخيل ونيل وشعب اصيل
أحب غيرك ده مستحيل
لغيرك قلبي يميل
دانت الهني والمني
والذكريات والعمر الجميل
**************
ولسه بحلم
والحلم ربيع اخصر
طارح علي الشجر
في عز العتمة قناديل
وغنوه لجريد النخل العالي
والورد فتح جوى الجناين
طارح غنوة في البساتين
شمسك مبتسمة ودافية
وبتغازل شط النيل
وعيون زغاب صغيرين
**************
ولسه بحلم
ابني بيت صغير
وازرع قدامه , شجرة توت
وشجرة ورد , وشجرة محبه
واغني للأحبة , وللناس الشقيانين
السمر الطيبين ولادك
وارسم الامل في عيون ولادي
و في بكرة اللي جاي
مه انا لسه برضك بحبك
برغم قسوتك بحبك
وبرغم كل شيء فيك بحبك
غصب عني مش بخطري بحبك
مش انتِ برضك امي
دمك هو دمي ولونك من لوني
ومش انا لسه برضك حبيبك
ولدك , سندك , عكازك
ومن غير ما تناديه
تلقيه قدامك , خدامك
ولا انت خلاص , نسياني وبيعاني ,
ومحيتي اسمي من سجلاتك
بس انا لسه برضك بحبك
ولسه بحلم
والحلم يراودني
اشوفك يا غالية
بتوبك الأبيض
صبية متعافية
والواد الحليوه حبيبك
لابس ابيض في ابيض
فوق حصانه الابيض
يخدك علي حصانه
يخدك في احضانه
ويطير بيك كما الرهوان
*********************