ﻭﺻﻴﺔ ﺃُﻡ...بقلم الشاعر المصري طه إبراهيم -مجلة نجوم الأدب والشعر

ﻟﻤﺎ ﺣﻤﻠﺖ ﺍﻟﺸﻨﻄﻪ ﻑ ﻛﺘﻔﻲ
ﻭﺍﻣﻲ ﺑﺘﺒﻜﻲ ﻓﻮﺳﻂ ﺍﻟﺪﺍﺭ
ﻗﺎﻟﺖ ﻟﻴﻪ ﻳﺎ ﺿﻨﺎﻱ ﻫﺘﻤﺸﻲ
ﻗﻠﺒﻲ ﻳﺎ ﻭﻟﺪﻱ ﻣﻮﻟﻊ ﻧﺎﺭ
ﺧﺎﻳﻔﻪ ﻳﺎ ﻭﻟﺪﻱ ﻋﻠﻴﻚ ﻡ ﺍﻟﻐﺮﺑﻪ
ﺃﻫﻞ ﺍﻟﺸﺮ ﻳﺎ ﻭﻟﺪﻱ ﻛﺘﺎﺭ
ﻭﺍﻧﺘﻪ ﻳﺎ ﺣﺒﺔ ﻋﻴﻨﻲ ﺻﻐﻴﺮ
ﻟﺴﻪ ﻣﻠﻜﺶ ﻳﺎ ﻭﺍﺩ ﻑ ﺍﻟﻘﺎﺭ
ﺧﻠﻲ ﺍﻟﺼﻮﺭﻩ ﺑﺘﺎﻋﺘﻚ ﺟﻨﺒﻲ
ﻗﺪﺍﻡ ﻋﻴﻨﻲ ﻟﻴﻞ ﻭﻧﻬﺎﺭ
ﻳﻤﻜﻦ ﺗﻤﻠﻲ ﺍﻟﺪﻧﻴﺎ ﻋﻠﻴﺎ
ﻟﻤﺎ ﺃﺗﻮﻩ ﻭﺳﻂ ﺍﻻﻓﻜﺎﺭ
ﻓﺠﺄﻩ ﺍﻟﻐﺮﺑﻪ ﻫﺘﺨﺪﻙ ﻣﻨﻲ
ﺇﻣﺘﻲ ﻫﺸﻮﻓﻚ ﺟﻮﻩ ﺍﻟﺪﺍﺭ
ﺍﻧﺖ ﻑ ﻋﻴﻨﻲ ﻭﺟﻮﻩ ﺍﻟﻨﻨﻲ
ﻗﻠﺒﻲ ﻋﻠﻴﻚ ﻳﺎ ﺣﺒﻴﺒﻲ ﺇﺣﺘﺎﺭ
ﺧﻠﻴﻚ ﻭﺍﻋﻲ ﻳﺎ ﻭﻟﺪﻱ ﻟﻨﻔﺴﻚ
ﺇﻭﻋﻲ ﺗﺴﻠﻢ ﻟﻸﺷﺮﺍﺭ
ﺇﻭﻋﻲ ﺑﻨﺎﺕ ﺍﻟﻠﻴﻞ ﺗﻐﻮﻳﻚ
ﺇﻭﻋﻲ ﺗﺠﻴﺐ ﻷﺑﻮﻙ ﺍﻟﻌﺎﺭ
ﺇﻭﻋﻲ ﺍﻟﻔﺘﻨﺔ ﺗﺄﺛﺮ ﻓﻴﻚ
ﻏﻠﻄﻪ ﺗﺸﺪﻙ ﺟﻮﻩ ﺍﻟﻨﺎﺭ
ﺃﺭﺽ ﺍﻟﻐﺮﺑﻪ ﻭﻓﻴﻬﺎ ﻋﺠﺎﻳﺐ
ﻓﻴﻬﺎ ﺍﻟﺸﺮ ﻭﻓﻴﻬﺎ ﻋﻤﺎﺭ
ﻓﻴﻬﺎ ﺍﻟﻌﻠﻢ ﻭﻓﻴﻬﺎ ﺍﻟﺠﺎﻣﻊ
ﻓﻴﻬﺎ ﺣﺠﺎﺕ ﻭﺍﻟﻠﻴﻞ ﺳﺘﺎﺭ
ﻭﺍﻟﻠﻲ ﻳﻔﺮﻁ ﻳﺎﻣﺎ ﻳﺸﻮﻑ
ﺩﻧﻴﺎ ﻋﺠﻴﺒﻪ ﻭﻟﻴﻞ ﻏﺪﺍﺭ
ﺇﻭﻋﻲ ﺗﻔﺮﻁ ﻳﻮﻡ ﻓﻲ ﺿﻤﻴﺮﻙ
ﺧﻠﻴﻚ ﻳﺎ ﺍﺑﻨﻲ ﻣﻊ ﺍﻷﺣﺮﺍﺭ
ﺇﻭﻋﻲ ﺗﺨﻠﻲ ﺍﻟﺸﻬﻮﻩ ﺗﻬﻴﻨﻚ
ﺗﻔﻀﻞ ﻋﺎﻳﺶ ﺟﻮﻩ ﺍﻟﺒﺂﺭ
ﺧﻠﻴﻚ ﻓﺎﻛﺮ ﻳﺎ ﺍﺑﻨﻲ ﻛﻼﻣﻲ
ﺣﻠﻘﻪ ﻓﻲ ﻭﺩﻧﻚ ﻟﻴﻞ ﻭﻧﻬﺎﺭ
ﺃﻭﻝ ﻣﺎﺗﺨﺶ ﺍﻟﻤﺤﺮﻭﺳﻪ
ﺇﻣﺸﻲ ﻭﺩﻭﺭ ﻉ ﺍﻻﺑﺮﺍﺭ
ﺑﻴﻦ ﺍﻷﺯﻫﺮ ﻭﺍﻟﻤﻘﺎﻣﺎﺕ
ﺇﻗﺮﺍ ﺍﻟﻮﺭﺩ ﻣﻊ ﺍﻷﺫﻛﺎﺭ
ﻭﺍﻗﺮﺍ ﺍﻟﻔﺘﺤﻪ ﻹﺑﻮﻙ ﻣﺘﻮﻟﻲ
ﻳﺎﻣﺎ ﻋﻠﻴﻬﻢ ﻟﻒ ﻭﺯﺍﺭ
ﻳﻮﻡ ﺍﻟﺠﻤﻌﻪ ﻳﺴﺎﻓﺮ ﺑﺪﺭﻱ
ﻗﻠﺒﻪ ﻣﺸﻌﺸﻊ ﺑﺎﻷﻧﻮﺍﺭ
ﺧﻠﻴﻚ ﻓﺎﻛﺮ ﺃﺑﻮﻙ ﺍﻟﻄﻴﺐ
ﻳﺎﻣﺎ ﺇﺗﻤﻨﻲ ﺗﻜﻮﻥ ﻑ ﺍﻟﻘﺎﺭ
ﺧﺪﻫﺎ ﻳﺎ ﻭﻟﺪﻱ ﺃﺑﻮﻙ ﻋﻦ ﺟﺪﻙ
ﻛﺎﻥ ﻣﻌﺮﻭﻑ ﺃﺣﺴﻦ ﻧﺠﺎﺭ
ﻟﻜﻦ ﻭﻟﺪﻱ ﺇﻧﺖ ﺍﻟﻠﻲ ﺇﺧﺘﺮﺕ
ﻭﺍﻧﺎ ﺣﻈﺮﺗﻚ ﻟﻴﻞ ﻭﻧﻬﺎﺭ
ﻳﺎﻟﻪ ﻳﺎ ﻭﻟﺪﻱ ﺍﻟﻠﻴﻞ ﻫﻴﻀﻠﻢ
ﺍﺭﻛﺐ ﻭﺍﻣﺸﻲ ﻑ ﺃﻱ ﻗﻄﺎﺭ
ﺭﺑﻲ ﻳﺼﻮﻧﻚ ﻳﺎ ﺍﺑﻨﻲ ﻳﺎ ﺳﻨﺪﻱ
ﻭﻳﺤﻔﻆ ﻋﻤﺮﻙ ﻡ ﺍﻷﺧﻄﺎﺭ
ﺗﻴﺠﻲ ﻟﺒﻠﺪﻙ ﺗﺎﻧﻲ ﺃﻓﻨﺪﻱ
ﻭﺗﻤﻠﻲ ﻋﻠﻴﺎ ﺍﻟﺒﻴﺖ ﻭﺍﻟﺪﺍﺭ