لسه فاكر
*************
لسه فاكر كل حاجه
واحنا لسه صغيرين
واحنا لسه عيال بنحبي
جنب أمي ف الحسين
أمي كات دايما تقولي
حط بلدك ف العينين
شيل ترابها فوق دماغك
خاف عليها م اللي باعك
وان سمعت حد هانها
اوعي مره تقول أمين
لسه فاكر كل حاجه
حتي لوني الأسمراني
لون ترابها تحت بابها
لون عيون أجمل شبابها
اللي دايما سهرانين
لسه فاكر كل حاجه
الا حاجه محيراني
لما كات أمي تقولي
كان أخويا عقله فين؟
لسه فاكر كل حاجه
لسه فاكر كل شيئ
كل ضحكه ف الرواقه
كل دمعه وقت ضيق
بس مش عارف اخويا
ابن أمي ...وابن أبويا
ليه بقي ضل الطريق
وللا شايله حجر مين؟
********
موضوع: ليه فاكر..بقلم الشاعر المصري رضا أبو الغيط- مجلة نجوم الأدب والشعر 
الخميس أبريل 21, 2016 2:38 pm
