ﻓﻴﻦ ﺍﻟﺜﻘﺎﻓﺔ ﻓﻴﻦ ؟..ﻟﻠﺸﺎﻋﺮ ﺍلمصري ﺳﻴﺪ ﺍﻟﺒﺎﻟﻮﻱ- مجلة نجوم الأدب والشعر

ﺷﺎﻋﺮ ﺑﻴﺴﺄﻝ ﻛﻠﻤﺘﻪ
ﻭﺍﻟﻜﻠﻤﺔ ﺧﺎﺭﺟﻪ ﻣﻦ ﺃﺯﻳﺰ
ﻟﻴﻪ ﺍﻟﻨﺒﻮﺓ ﺑﺘﻨﺘﺤﺮ ؟
ﻭﺍﻻﻧﺘﺤﺎﺭ ﺍﺻﻼ ﻋﺰﻳﺰ
ﻟﻴﻪ ﺍﻟﺴﻔﻴﻨﻪ ﺍﺳﺘﺒﺪﻟﺖ
ﻧﻮﺣﻬﺎ ﺑﺄﺳﻴﺰ ؟
ﻟﻴﻪ ﺍﻟﻠﻰ ﻋﺎﻳﺰ ﻳﺴﺄﻟﻚ
ﺑﻴﻘﻮﻝ ﺑﻠﻴﺰ ؟
ﻫﻮ ﺍﺣﻨﺎ ﻓﻴﻦ ! ﻭﻻ ﺍﺣﻨﺎ ﻣﻴﻦ !
ﻭﻻ ﺍﺣﻨﺎ ﺍﺣﻨﺎ ﻑ ﺍﺣﻨﻨﺎ
ﻣﻔﻴﻨﺎﺵ ﻓﻄﻴﻦ؟
ﻣﻔﻴﻨﺎﺵ ﻣﻨﺎﺑﺮ ﺗﻨﺘﺒﻪ؟
ﻭﻻ ﻧﺎﺱ ﺑﺘﺴﺄﻝ ﻧﻔﺴﻬﺎ
ﻓﻴﻦ ﺍﻟﺜﻘﺎﻓﺔ ﻓﻴﻦ ؟
ﻋﺎﻣﻠﻴﻦ ﻟﺮﻭﺣﻨﺎ ﻣﻴﺖ ﻫﺮﻡ
ﻭﺍﻻﻑ ﻣﺒﺎﻧﻰ ﻣﻦ ﻗﺼﻮﺭ
ﻻ ﻑ ﻳﻮﻡ ﺑﺘﻔﺘﺢ ﻗﻠﺒﻬﺎ
ﻭﻻ ﻳﻮﻡ ﺑﺘﺴﻤﻌﻨﺎ ﺍﻟﺼﺨﻮﺭ
ﺑﺎﻳﺲ ﺍﺩﻳﻚ ﻭﺟﺒﻴﻦ ﺟﻨﺎﺑﻚ
ﻳﺎ ﺃﻣﻞ ﺧﻠﻴﻚ ﺻﺒﻮﺭ
ﺧﻠﻴﻨﺎ ﻧﻴﻞ ﻋﻤﺎﻝ ﺑﻴﺼﺮﺥ
ﻣﻦ ﺯﻣﻦ ﻟﻴﻪ ﻟﻮﺛﻮﻩ؟
ﺧﻠﻴﻨﺎ ﺟﻴﻞ ﻋﻤﺎﻝ ﺑﻴﺘﺮﺟﻰ
ﺍﻟﺒﺸﺮ ﻟﻮ ﻳﺴﻤﻌﻮﻩ
ﺧﻠﻴﻨﺎ ﻋﻴﺴﻰ ﺍﻟﻠﻰ ﺍﻧﻈﻠﻢ
ﻋﻠﺸﺎﻥ ﻧﻌﻮﺩ ﺯﻳﻪ ﻑ ﻳﻮﻡ
ﺧﻠﻴﻨﺎ ﻣﻮﺳﻰ ﻭﺍﻟﻌﺼﺎ
ﺧﻠﻴﻨﺎ ﺑﺮﻛﺎﻥ ﺍﻟﻠﻬﺐ
ﺧﻠﻴﻨﺎ ﺍﺣﺮﻑ ﻣﻦ ﺫﻫﺐ
ﻣﻬﻤﺎ ﻧﺸﻮﻑ ﺿﻠﻤﻪ ﻧﺸﻮﻑ
ﺑﺎﻳﺲ ﺍﺩﻳﻚ ﻭﺣﻴﺎﺓ ﺟﻨﺎﺑﻚ
ﻳﺎ ﺃﻣﻞ ﺧﻠﻴﻚ ﺻﺒﻮﺭ
ﺧﻠﻴﻚ ﻣﻌﺎﻧﺎ ﻑ ﺻﺒﺮﻧﺎ
ﻳﻤﻜﻦ ﻧﻜﻮﻥ ﻟﻠﻀﻠﻤﻪ ﻧﻮﺭ
ﻳﻤﻜﻦ ﻧﺒﻴﻦ
ﻳﻤﻜﻦ ﻧﻼﻗﻰ ﺻﻮﺕ ﻳﺴﺎﻧﺪ ﺻﺮﺧﻨﺎ
ﻓﻴﻦ ﺍﻟﺜﻘﺎﻓﺔ ﻓﻴﻦ ؟