مبتدأ ما لوش خبر... بقلم الشاعر المصري رفعت فايد ـ جلة نجوم الأدب والشعر

مبتدأ ما لوش خبر !!! ..........
------------------------------------------------
أكيد أكيد ... فى شىء غلط
عقد كلامى يا عمّنا منّى انفرط
حاحكى الحكايه بمبتدأ ما لوش خبر
مهو اللى شايفه .. خلاّ راسى حينفجر
محصلش ف ايّام الحجاره والعبط
أكيد أكيد... فى شىء غلط
.......................................................
قمنا بثوره... شيلنا فيها نظام فساد
وفرحنا قولنا... دخلنا على موسم الحصاد
طلع لنا فجأه غراب.... سرقها فى جوّ ضباب
حوّلها من سلم لخراب
وشلّته عصابه لبط...ملوا الشوارع بالزبط
ودى كات بداية الغلط
.............................................................
الشعب ثار .. رفع الشعار
صرخ وقال... ارحل يا عار
بلاش مرار
خليت بلاد الأمن قايده فيها نار
إرهاب دمار
رميتوا طفل برىء.. من سطوح أعلى عقار
وتقوللى دين .. دا سبّ دين
يااهل الغلوّ والشطط
................................................................
وبلدنا طالعه تبنى مجدها
زى زمان
كات مصر سيّدة المكان
لها مهابه وصولجان
من عهد مينا .. كات مناره
بجيش نظامى وبرلمان
طلع علينا فى الأوان
جهله تشكك فى الخطط
..................................................................
وناس جيران... كات مصر ليهم
حضن رحمه وبيت حنان
اتنكّروا لها... ويشتموها
وحاربو جيشها... اللى عشانهم
ضحّى لجل ما يعيشوا ف أمان
طلعت حماس
ردّت جميلنا بالغلط
......................................................................
والعرب سابوا عدوّهم
وبيقتلوا فى بعضهم
وبدال مايبقوا يد واحده
يفرّقوا فى شملهم
والفرقه كشفت ضعفهم
وبعضهم... سلّم أموره عدوّهم
فتنه وأصابت أرضهم
طاوعوها بجهل وعبط
........................................................................
ريّس حمانا بجيشنا.... حافظ عالبلد
عاوز يجيب الخير .. لكل الشعب
من شيبه لولد
سافر فى كل الدنيا...يهتف تحيا مصر
الدنيا حكّامها وشعوبها
قدّرت فى العصر مصر
وبعض من أبناءها .... جحدوا فضلها
وهربوا خارج أرضها .. بيسبّوا مصر
ويعتدوا على وفدها
رافعين شعار ماسونى
أسود من مغارة فحم.. والعن منّها
نطف حرام .. عايشين هوام
كما الكلاب الضالّه وكتير م القطط
..........................................................................
وحتى جوّه فى مصرنا
إدارات كسوله معطّلين
كل المساعى والخطط
ريّسنا يجرى .. وهمّا يحبوا
وبعضهم .. فى النوم غطط
.............................................................................
يا مصر .... يا بلدى العزيزه
ليه كده ؟!
شعوب كتير ... كات تحتنا
طلعت لفوق
واحنا ما زلنا.. فى الجدل والسفسطه
زى الضفادع فى البرك
نازلين نقيق
وفينا بوم
لا عاجبها لا ريّس .. ولا أى خطط
يبقى أكيد .. فى شىء غلط .
......................................