البوستات
بوستات بوستات .. ماليا الصفحات
تقرا كلام يسعدك ... وساعات تشوف سخافات
اّراء وأنماط وعالم ... الفيس ده دا دنيا
تلفّها وانت قاعد .. وتشوف كتير حاجات
فيها اللى بيحب بلده .. ومخلص النيّات
وفيها حاقد وحاسد .. بوستاته بذاءات
وفيها ورد الجناين .. وأجمل الزهرات
وفيها اللى تشوفه .. تستعيذ بالله
وتقرا مع قل أعوذُ.. يس مع الصاّفّات
وفيها اللى تشوفه تنفتح نفسك
وتقرا بوستاته .. بدل المرّه قول مرّات
وفيه اللّى سلبى .. ملوش لا طعم ولا ريحه
بوستاته هايفه .. وتصنيفه .. واحد لتّات
وفيه اللى لو شوفته مرّه .. يأسرك حسنه
ما يروحش من بالك أبدا .. لو تفوت سنوات
وفيه عزيز وعزيزه بحبّهم جدا
رغم انّى ما عرفتهم إلّا على الصفحات
وفيه بقى اللى شاغلنى .. وكلامه ساحرنى
والقهوه بينى وبينه .. مكاتيب على مراسلات
لكن بقى الفيس صديقى ونديمى فى الوحده
عايش فى زحمة كلام فى شوارع البوستات .
....................................