شئ م الحنين. بقلم الشاعر المصري أيمن بلال- مجلة نجوم الأدب والشعر

.........شئ م الحنين........

بيشدني ليكي شئ زي الحنين
رغم اني ما أعرفش انتي مين
حكاية بأعيشها لما صورتك بأشوفها
بتاخدني معاها ف دنيا العاشقين
..........
من ضحكة عينيكي بأعيش الحياه
ونظرة منها القي عمري معاكي تاه
وكل اللي ضاع مني زمان بألقاه
ومن عينيكي بتترسم حلاوة السنين
...........
قالوا زمان في الحب كفاية النظر
دي الوردة بتفتح يادوب بحبة مطر
والفجر من خيط نلقي نوره حضر
وكفاية ابتسامتك أعيش بيها سنين
..........
مش هسألك أنا فين من دنيا قلبك
كفاية عليا في الخيال أعيش حبك
تنده عينيكي قلبي يبقي ف لحظة جنبك
جاي بشوق جاي بحب مليان حنين
..........
تنزل ستاير ليلي تهل صورتك وتندهيني
نسهر سوا وياخدني الهوي لحلاوة سنيني
وتنطق صورتك حبيبي قرب من عيني
وبين ايديكي بأنسي حتي أنا أبقي مين
.. ...
حبيبتي رغم الغياب رغم الالم والحنين
حبيبتي رغم اني ما أعرفش انتي مين
بس صورة جمعت ف لحظة بين اتنين
انتي وأنا وحكاية مكتوبة علي جبين السنين
.................